CCT Builders, 4-2 na's LBA

CEBU, Philippines – Nag-inusara na sab sa nang dapit sa standing ang CCT Builders human makaeskapo bitbit ang 73-72 nga kadaogan batok sa Mobile Legends sa ligas nilang duwa sa Lamac Basketball Association (LBA) Friendship Cup 2019 niadtong Sabado didto sa Lamac gym sa Consolacion.

Labaw og kuwatro puntos ang Mobile Legends sa kapin uno minutos ang nahibiling oras sa duwa, 70-66, apan naungot ang ilang iskor hinungdan nga nakatabla ang CCT Builders, 70-all  kortesiya ni Lloyd Chavez sa nahibiling 30 segundos. Gihatagan unta og kahigayonan ang Mobile Legends nga mokawat sa daog dihang ila ang bola human magtabla sa katapusang higayon, 72-72 sa free throws ni Richard Madrid, apan nakahimo sila og krusyal nga turnover.

Si Francis Palero nakakubit og foul nga maoy naghatod kaniya ngadto sa free throw line sa nahibiling otso segundos. Usa ra sa duha ka free throws ang napasud ni Palero, apan igo na kaayo kini aron mahatagan ang CCT Builders ni playing team owner Engr. Chucho Tan og 4-2 nga baraha.

Si Palero miposa og 17 puntos, samtang si Madrid miamot og 16 puntos aron mangu sa scoring sa CCT Builders. Sila si Roy Ermac ug Jay Abella mitampo'g 10 puntos matag usa sa maong kadaogan.

Ang Mobile Legends gipangulohan sa team manager niining si Tata Pellejera nga miburak og 18 puntos, gisudan ni Atan Lausa sa iyang 13 puntos.

Sa laing aksiyon, nagmangtas si Rico Sungahid diin mipabuhagay kini og 34 puntos aron pangulohan ang Dota 2 nga nimasaker sa Marvel Heroes, 92-64.

Upat sab ka players ang miiskor og double figures sa team ni  Junax Ermac nga nagtangag og 4-3 record. Ang 2-3 nga Marvel Heroes ni Roger Lagozar, gipangulohan nilang Joseph Saranza ug Roger Lacio nga nagkumboya'g 23 puntos.

PUNTOS MATAG USA

Unang duwa:

DOTA 2 (92) – Sungahid 34, Felix 12, Rio 11, Vanz 10, Junax 10, Aya 9, Geverola 3.

MARVEL Heroes (64) – Saranza 12, R. Lacio 11, Noel 10, Juksan 9, Tatay 5, Badayos 4, Fredo 3, Lagozar 2, Pitogo 2, Ruben 2, Joel 2, Malunjao 2.

Ikaduhang duwa:

CCT Builders (73) –  Palero 17, Madrid 16, R. Ermac 10, Abella 10, Rosales 8, Chavez 8, Goc-ong 2, Cabahug 2.

MOBILE Legends (72) – Pellejera 18, Lausa 13, Dayday 11, Reuyan 10, Lacio 6, Quijano 5, Monares 4, Boyet 2.