Walker nagplanomutapon sa Celtics

CEBU, Philippines — Personal nga gipahibalo ni All-Star point guard Kemba Walker ang mga kadagkoan sa Charlotte Hornets sa iyang intensiyon nga mobiya sa koponan ug moduwa sa Boston Celtics sa sunod season. Si Walker gipaabot nga tanyagan og $141 million nga max contract sa Celtics ug atangan karong adlaw kung dawaton niya kini. Una na nga gidungog nga mubalhin sa Celtics si Walker tungod usab sa grabeng interes sa koponan kaniya. Si Walker mamahimo nga solusyon sa suliran sa Celtics sa starting point guard tungod usab sa seguradong paghawa ni Kyrie Irving kinsa gidungog nga mubalhin usab sa Brooklyn Nets. Ang paghawa ni Walker usa unya ka dakong pagsuway sa Hornets tungod usab kay wala na silay masaligang point guard human usab sa miaging buwan, gi-anunsiyo ni veteran star Tony Parker ang iyang pagretiro sa NBA.