Grizzlies mi-trade ni Conley sa Jazz
CEBU, Philippines — Ang Memphis Grizzlies mi-trade sa beterano nilang point guard nga si Mike Conley ngadto sa Utah Jazz hulip sa tulo ka mga players.
Matud pa sa usa ka kasaligang tinubdan sa The Associated Press, nga si Conley gilabay sa Grizzlies ngadto sa Jazz puli nilang Jae Crowder, Kyle Korver ug Grayson Allen. Mao kini ang ikaduhang dako nga trade nga mibuto sa Western Conference sukad gilabay sa New Orleans Pelicans si Anthony Davis ngadto sa Los Angeles Lakers.
Mismo si Conley ang mikompirma sa nahitabong pagbinayloay og players pinaagi sa Twitter diin iyang gipasalamatan ang Memphis nga maoy naghulma kon unsay naabot sa iyang karera karon. Si Conley miduwa sa Memphis sud sa 12 ka tuig diin siya maoy nagkupot sa dungog isip all-time leading scorer sa Grizzlies. Sa miaging season, mi-average siya og 21.1 points, 6.4 assists ug 1.3 steals matag duwa.
Dako siya og natabang pagduso sa Grizzlies ngadto sa playoffs sud sa pito ka sunod-sunod nga higayon ug ingon man sa ilang pagtaak sa 2013 West Finals.
- Latest
