Palicte moaway na alang sa WBO title

CEBU, Philippines – Sa ikaduhang higayon, ang Pinoy'ng boksidor nga si 'Mighty' Ashton Palicte (25-2-1, 21KOs) mosuway og kab-ot sa iyang damgo nga mahimong world champion sa dihang iyang sangkaon si Kazuto Ioka (23-2, 13KOs)  alang sa bakanteng WBO super flyweight title karong gabii didto sa Makuhari Messe Hall sa Chiba City, Japan.

Sa una niyang pagsuway, si Palicte napakyas human ang away nila sa kababayan niyang si Donnie 'Ahas' Nietes gitabla niadtong Septiyembre sa miaging tuig.

Milampos hinuon si Nietes pagbira sa WBO super flyweight title human pildiha si Ioka pinaagi sa desisyon aron mamahimong usa ka four-division world champion.

Human niini, nimando unta ang WBO og rematch nilang Nietes ug Palicte, apan wala kini madayon gumikan kay gisalikway kini ni Nietes.

Boluntaryo nga gibakantihan ni Nietes ang iyang trono aron hatagan si Palicte og laing tsansa pagtuman sa iyang ambisyon.

Dili hinuon sayon nga tahas ang sagubangon ni Palicte gumikan kay manulong man siya sa teritoryo sa iyang kontra. Masaligon hinuon ang head trainer ni Palicte nga si Rodel 'Batang Mandaue' Mayol nga dako og tsansa modaog ang iyang boksidor pinaagi  sa knockout o desisyon.