Black Panthers mitukob ikaduha nilang daog

CEBU, Philippines – Miagi pa og overtime ang Black Panthers una nila matukob ang 95-85 nga kadaogan batok sa Mobile Legends aron mailog ang liderato sa Lamac Basketball Association (LBA) Friendship Cup 2019 niadtong Miyerkules didto sa Lamac gym sa Consolacion.

Gipangulohan gihapon ni Richard Madrid ang daog human miburak og 21 puntos, samtang si Francis Palero nga maoy responsable paghatod sa duwa ngadto sa overtime, miamot og 20 puntos.

Dumadaog unta ang Mobile Legends dihang labaw sila sa himalatyong segundos, 82-80 ug mahimo pa sab unta nga bingaton ang bentaha dihang ila ang ball possession, apan si Greg Perjes nakahimo og turnover ug nakuha ni Roy Ermac ang bola ug dayong pasa alang sa usa ka fastbreak play ngadto ni Palero aron pagtabla sa iskor, 82-all human sa regulasyon.

Giablihan ni Ermac ang dugang singko minutos pinaagi sa iyang tres ug sukad niadto, nagpusot-pusot na ang iskor sa Black Panthers. Grabe sab kalig-on ang depensa sa Black Panthers diin igo lang nila gipaiskor og tres puntos ang Mobile Legends sa overtime.

Si Ermac mitampo og 15 puntos, samtang si Jay Abella miambit og 14 puntos sa Black Panthers nga nagtangag na og 2-0 nga baraha.

Ang Mobile Legends nga adunay 2-1 record, gipangulohan nilang Tata Pellejera ug Atan Lausa nga nagkumbinar og 37 puntos.

Sa laing aksiyon,  ang Marvel Heroes nakabangon human masukamod dihang ilang gipahimungtan ang dinaog-daog nga Avengers, 75-65.

Si Roger Lacio mibagnos og 20 puntos, samtang si Juxsan Cairo mipaksit og 18 puntos sa  Marvel Heroes nga aduna na'y 1-1 win-loss record.

Ang Avengers nga nangiwit sa standing sa ilang 0-3 nga baraha, gipangulohan ni Konsehal Odog Dayday nga mikadlit og 24 puntos, 21 niini iyang nahimo sa second half.

Si Dario Casiao miabuno'g 12 puntos, samtang sila si Roso Abellon ug Jun Monreal nagtampohay og 10 puntos sa napildeng Avengers.

Ang liga namugna pinaagi sa paningkamot sa presidente niining si Roy Ermac. Ang mga duwa  gipadagan ni league commissioner Gene Pellejera.

PUNTOS MATAG USA

Unang duwa:

BLACK Panthers (95) – Madrid 21, Palero 20, Ermac 15, Abella 14, Goc-ong 6, Rosales 5, Cabahug 4, Quiao 3, Malunjao 2, Borces 2, Tan 2.

MOBILE Legends (85) – T. Pellejera 25, Lausa 12, Edward 10, Dayday 9, Perjes 7, Custado 6, Monares 4, Lacio 4, Quijano 4, Liquido 2.

Ikaduhang duwa:

MARVEL Heroes (75) – R. Lacio 20, Cairo 18, Malunjao 9, Pitogo 8, Fredo 8, Lagozar 4, Tatay 4, Badayos 2, Awing 2.

AVENGERS (65) – O. Dayday 24, Casiao 12, Abellon 10, Monreal 10, Dence 6, Wowe 3, Joefil 2, Malicay 2.