Injury ni Durant nakatay-og sa NBA

CEBU, Philippines — Ang labing uwahing injury ni Golden State Warriors superstar Kevin Durant nakakatay-og sa NBA gumikan kay duna may mga teams nga nangandam sud sa pipila ka tuig sa tinguha nga makubit siya sa free agency karong Hulyo.

Human makahiagum og right Achilles injury atol sa Game-5 sa NBA Finals batok sa Toronto Raptors niadtong Martes, si Durant mag-atubang karon og usa ka tuig nga rehabilitasyon ug laing usa ka tuig aron makabalik siya sa maayong kondisyon ug hait niyang porma.

Sa nahitabo ni Durant, tataw nga mausab ang dagan sa giatngan nga NBA free agency sunod bulan.

Sa iyang bahin, lagmit dili buhian ni Durant ang nahibilin niyang kontrata uban sa Warriors nga mibalor og $31.5 million. Mas labing maayo kaniya nga magpaalim sa iyang injury sa pamilyar nga palibot uban sa iyang mga teammates nga mitamod kaniya isip igsuon.

Gawas sa Warriors, dunay pipila ka mga teams nga interesado mohabwa og milyones dolyares gikan sa ilang kaban aron lamang makuha si Durant unya sa free agency.

Kini naglangkob sa New York Knicks, Brooklyn Nets, Los Angeles Clippers ug Los Angeles Lakers.

Apan tungod sa pagka-angol og balik ni Durant, dako kaayo ang posibilidad nga mausab ang ilang huna-huna ug direksyon sa NBA free agency. 

Imbes ni Durant, adto mapunting ang ilang atensiyon sa umaabot nga mga sikat nga free agents sama nilang Kawhi Leonard, Anthony Davis, Kyrie Irving ug Jimmy Butler. 

Mao kini ang angayan atngan sa tanang NBA fans karong Hulyo.