Black Panthers, Mobile Legends midaog dayon sa LBA Friendship Cup 2019
CEBU, Philippines — Nakatukob dayon og daog ang Black Panthers ug Mobile Legends pagsugod sa Lamac Basketball Association (LBA) Friendship Cup 2019 niadtong Miyerkules didto sa Lamac open court sa Consolacion.
Ang Black Panthers mipilde sa Avengers sa iskor nga 100-93, samtang ang Mobile Legends mipukan sa Dota, 88-84.
Mikabkab og 23 puntos si Richard Madrid aron mangu sa pito ka players sa Black Panthers nga mitusik og double figures.
Naglisud ang Black Panthers sa nag-unang duha ka kuwarter hinungdan nga naalkansi sila sa halftime, 56-57. Apan nakabawi sa third period dihang mipasiugda sila og makalisang nga rally sa pagpangu nilang Madrid ug Roy Ermac nga nagkumboya'g 17 puntos aron molansang og 83-75 nga labaw human sa tulo ka kuwarter Kontrolado na nila ang duwa sukad niadto.
Si Ermac mitampo og 15 puntos. Lain pang naka-double digits mao sila si Jay Abella nga adunay 16 puntos, Manuel Rosales sa iyang 12 puntos ug silang Chucho Tan, Jun Borces ug Philip Goc-ong nga parehong miantog og 10 puntos.
Wala kapusli ang 40 puntos ni Jun Monreal kay napilde man ang Avengers. Sila si Dario Casiao ug Jessie Malicay nagkumbinar og 31 puntos sa napildeng Avengers.
Sa laing bahin, sila si Andoy Lacio ug Tata Pellejera mibahog og 18 puntos matag usa aron pangulohan ang Mobile Legends nga miposte og 51-39 nga bentaha sa halftime.
Si Atan Lausa miamot og 14 puntos, samtang si Greg Perjes miambit og 10 puntos sa maong daog.
Nangulo sa Dota mao si Red Quijano pinaagi sa iyang 22 puntos, gisundan ni Rico Sungahid sa iyang 18 puntos ug Vanz Abatayo nga adunay 12 puntos.
PUNTOS MATAG USA
Unang duwa:
MOBILE Legends (88) – Lacio 18, T. Pellejera 18, Lausa 14, Perjes 10, Monares 8, Dayday 6, Quijano 5, Boyet 4, Reuyan 3, Custado 2.
DOTA (84) – R. Quijano 22, Sungahid 18, Abatayo 12, Geverola 7, Montermoso 7, Tyron 7, Junax 5, Perez 4, Anguis 2.
Ikaduhang duwa:
BLACK Panthers (100) – Madrid 23, Abella 16, R. Ermac 15, Rosales 12, Tan 10, Borces 10, Goc-ong 10, Malunjad 4.
AVENGERS (93) – Monreal 40, Casiao 21, Malicay 10, Vequizo 9, Joefil 7, Dence 7, Valle 3.
- Latest
