Sweep gyud!

CEBU, Philippines — Sa ikalimang sunod-sunod nga higayon, miabante na sab sa NBA Finals ang Golden State Warriors human nila gi-sweep ang Portland Trail Blazers, 119-117 kagahapon didto sa Moda Center  sa Portland, Oregon.

Sa ilang pagsilhig sa Trail Blazers sud sa upat ka duwa aron angkonon ang korona sa Western Conference, ang Warriors nahimo nga ikaduha pa lamang nga team sa kasaysayan sa NBA sunod sa Boscon Celtics nga nakasagunson og sud sa Finals sud sa lima ka higayon. Ang Celtics maoy unang mikulit sa record human gidominar ang liga sud sa 10 ka sunod-sunod nga season gikan niadtong tuig 1957 ngadto sa 1966.

Sangkaon sunod sa Warriors ang modaog sa East finals tali sa Milwaukee Bucks ug Toronto Raptors

Laraw sunod sa two-time defending champion Warriors nga mamahimong labing unang team sukad sa Los Angeles Lakers niadtong 2000, 2001 ug 2002 nga makasakmit og talagsaong grandslam title. Samtang sila si Curry ug Green mikulit og record isip labing unang teammates sa kasaysayan sa liga nga mikadlit og triple-double sa susamang duwa sa playoffs.

Si Curry mikolekta og 37 puntos, 13 ka rebounds ug 11 ka assists, samtang si Green mikolekta og 18 puntos, 14 ka rebounds ug 11 ka assists.

Sila sab maoy responsabli pagpadaog sa Warriors sa overtime. Si Curry maoy nagpasa sa assist nga miresulta ngadto sa usa ka 3-pointer ni Green nga nakahatag sa Warriors og 119-115 nga labaw sa nahibilin nga 39.6 segundos sa overtime.

Dalaygon kaayo ang gihimong pagbangon sa Warriors human malubong og 17 puntos sa ikatulong kuwarter.

Sa dihang nagtabla ang iskor, 111-111  ang duha ka koponan parehong dunay tsansa nga modaog sa regulasyon, apan si Curry natawgan og travelling sa wala pa kini milansang og tres nga wala ma-counted. Sa sunod nga posisyon, si Lillard wala makapasud sa iya tira kay nabaraw sa hugot nga depensa sa Golden State.

Si Lillard mitapos uban ang 28 puntos bisan og dunay gibatyag sa iyang nabulag nga gusok, samtang si Meyers Leonard maoy nangu sa pilderong Blazers bitbit ang 30 puntos ug 12 ka rebounds.