Kanhi coach sa Lakers gikiha'g "sexual abuse"

CEBU, Philippines — Padayon ang kontrobersiya sa sikat nga NBA coach nga si Luke Walton tungod kay nag-atubang karon kini og kasong 'sexual abuse'.

Si Walton nga bag-o lang nimugna og kasikas human mibiya sa Los Angeles Lakers ug mibalhin sa Sacramento Kings, gireklamo sa usa ka sports reporter Kelli Tennant.

Ang maong pagpangabuso nahitabo hinuon niadto pang tuig 2016 ug wala usab mihatag og rason si Tennant nganong karon lang siya mireklamo.

Si Tennant misaysay nga nakigkita siya ni Walton sa usa ka hotel alang unta sa usa ka interview, apan wala niya damha nga dihang misulod siya sa lawak sa NBA coach, kalit siyang gilayog paingon sa kama ug gihikap  ang mga pribadong bahin sa iyang lawas. 

Tungod kay wala na siya sa Lakers, ang kadagkoan sa Kings na karon ang modala sa labad kabahin sa reklamo nga giatubang ni Walton. Wala pa usab mihatag og opisyal nga pamahayag ang kanhi NBA champion nga si Walton segun sa tambag sa iyang abago.