Palicte tirada ang bakus nga gihubo ni Nietes

CEBU, Philippines — Suwayan pagkab-ot og usab ni 'Mighty' Ashton Palicte ang iyang damgo nga mamahimong usa ka world champion sa iyang pakigharong sa Hapon nga si Kazuto Ioka alang sa WBO super flyweight title karong Hunyo 19 didto sa Japan.

Kasamtangang bakante ang titulo human si four-division world champion Donnie Nietes boluntaryong mihubo sa iyang bakus kay dili gustong makig-rematch ni Palicte segun sa mando sa WBO. Nakuha ni Nietes ang ikaupat niyang korona sa ikaupat nga weight division human gipukan si Ioka pinaagi sa split decision niadtong Disyembre 31, 2018 didto sa Japan.

Samtang si Palicte nakaangkon og katungod nga hagiton og usab si Nietes human gipalukapa ang Mehikanong si Jose Martinez atol sa ilang WBO title eliminator niadtong lang Enero.

Kay gibiyaan man ni Nietes ang iyang trono, sila si Paclite ug Ioka maoy nakapahimus sa higayon nga mag-ilog sa korona sa WBO 115-pound division.

Si Palicte nagkupot og 25-2-1 record uban ang 21KOs, samtang si Ioka nagtangag og 23-2 nga baraha uban ang 13KOs.