United VC lusot sa Sta. Lucia
Laro Bukas (The Arena)
4 pm Petron vs Sta. Lucia
6 pm F2 Logistics vs Foton
MANILA, Philippines — Nakatakas ang United Volley Club sa matinding puwersang inilatag ng Sta. Lucia Realty upang kubrahin ang makapigil-hiningang 21-25, 25-18, 23-25, 25-14, 15-11 desisyon sa huling araw ng eliminasyon sa 2019 Philippine Superliga Grand Prix kahapon sa The Arena sa San Juan City.
Solido ang laro ni American outside hitter Yaasmeen Bedart-Ghani na pumalo ng 25 puntos galing sa 21 attacks at apat na blocks para pamunuan ang United VC na harangin ang tangkang upset ng Lady Realtors.
“We’ve grown a lot since our last match. I think when we played Sta. Lucia last time we were down 0-2 and this time it was back and forth. We’re still finding ourselves but I think we really held break moments this game,” ani Bedart-Ghani.
Hindi rin nagpakabog si Filipino-American Kalei Mau na nagsumite ng 26 puntos at 12 digs gayundin si playmaker Taira Alohi Robins-Hardy na may 22 excellent sets at 12 markers na nakuha nito sa limangblocks, limang attacks at dalawang aces.
Nagbigay ng solidong suporta sina local players Amy Ahomiro, Arianne Angustia at Shanen Palec para tulungan ang United VC na makuha ang 7-7 rekord.
Papasok sa quarterfinals ang United VC hawak ang No. 5 seeding kung saan makakasagupa nito ang No. 4 Cignal HD na armado ng twice-to-beat card.
Nahulog naman ang Lady Realtors sa 2-12 card.
Magsisimula ang quarterfinals bukas (Sabado) kung saan maghaharap ang No. 1 at No. 8, No. 2 at No. 7, No. 3 at No. 6 at ang No. 4 at No. 6.
- Latest
