Mga bagong coaches sa Governor's Cup

CEBU, Philippines – Labaw sa pagtimon sa tagsa-tagsa nila ka mga koponan, ang tulo ka  bag-ong coaches nga miapil sa aksiyon sa 2019 Cebu Governor's Cup Inter-Cities and Municipalities Under 21 Developmental Basketball Tournament nagpas-an sab og mas bug-at nga bagahi dili lamang pagbaid sa abilidad sa ilang mga players, apan lakip sab paggiya kanila aron matuman ang ilang mga pangandoy nga mamahimong sunod nga mga Sugboanong bitoon sa natad sa basketbol.

Sa ilang panahon isip   players, sila si coach Jeff Codera sa Tabuelan, Paul Alelu Flores sa Consolacion ug Gary Cortes sa Mandaue miagi sa pit-os nga dalan, apan gumikan sa ilang pagpursige ug determinasyon nakasugakod sila sa tanang mga kalisdanan nga ilang naagian dayon na ngadto sa pagkulit nila og pangan ning paugnat sa kusog nga labing duol sa ilang kasingkasing.

Si Codera dalaygon nga misulbong gikan sa pagkadispatser sa dyip sa Dakbayan sa Lapu-Lapu ngadto sa usa ka skills trainer ug coach sa Amerika diin siya mapasigarbuhon nga sakop sa NBA Golden State Warriors' training camp.

Samtang si Flores nagsakripisyo nga malayo sa iyang pamilya sa linghod nga edad aron gukdon ang iyang damgo human siya gi-recuit sa Far Eastern University sa University Athletic Association of the Philippines (UAAP) diin siya nakadaog og duha ka sagunson nga titulo sa FEU Tamaraws niadtong 2005 ug 2006 kauban si Arwind Santos nga usa na karon ka PBA superstar sa San Miguel Beermen.

Sa iyang bahin, si Cortes misilyo sa iyang tatak isip champion player ug champion coach sa University of the Visayas human iyang gituboy ang UV Lancers ngadto sa talagsaong grandslam title sa Cebu Schools Athletic Foundation, Inc. (CESAFI) basketball tournament niadtong 2016 ngadto sa 2018.

Karon nga sila na maoy nagkupot sa renda isip coach, sila si Codera, Flores ug Cortes dunay laing obligasyon nga mao ang pagdagkot og kayo sa kadasig ug paglaum sa dughan sa ilang mga players pinaagi sa maanindot nilang mga sugilanon nga ilang ikapaambit .

"Akong pasalamatan kadtong nagpasiugda ning torneyo kay dako gyud kaayo ni nga tabang sa atong grassroots basketball dinhi sa Sugbo," matud pa ni Codera. "Blessing kaayo ni nako nga  oportunidad nga mo-coach sa Tabuelan.  Tsansa ni nako nga ma-share ang tanan nakong mga nakat-onan ug ingon man ang akong passion ngadto sa mga bata."

Gisugat og pilde ang Tabulen sa ilang kampanya sa Gov's Cup, apan midaog kaupat sa sunod nilang lima ka duwa aron pag-angkon og luna sa quarterfinals.

"Labaw sa pagdaog sa mga duwa, akong pilosopiya mao ang pag-abli sa potensiyal sa akong mga players ug himuon sila nga maayo nga tawo sud ug gawas sa korte," dugang pa ni Codera nga nakahashas na og pila ka mga national team players sama nilang Jeff Chan (Gilas Pilipinas), Adrian Zamora (Mexico) ug Reggie Hearns (Team USA) nga nakaduwa kadiyot sa Team USA.

Sa habig ni Flores, gusto niyang tudloan og leksiyon ang iyang mga bata dili lamang kabahin sa basketbol, apan sa kinabuhi human sa basketbol sama sa iyang napahimuslan karon.

"It's a mixed emotion. I felt happy and excited to be in coaching again. Happy because this is another chance to share my learning experience in the field of basketball specially how to manage time being a student-athlete," sumala pa ni Flores. "And it's not just basketball but life after playing Basketball, of which I am enjoying now."

Si Flores migiya sa Consolacion Sarok Weavers ngadto sa duha ka sagunson nga daog batok sa Mandaue ug Cordova, apan nabaslan sila sa Cordova sa miagi nilang duwa. Magtukmod kini kaniya ngadto sa krusyal nga duwa batok sa Mandaue sunod semana.

Karong Abril 7, sangkaon ni Flores si Cortes, ang tinamod nga coach sa Mandaue.

Sama nilang Codera ug Flores, si Cortes dunay kaugalingon niyang paagi pagdasig sa iyang tropa.

"Ako kanunay sila pahinumduman sa importansya sa kakugi, determinasyon ug disiplina. Bisan diin sila gikan, ug bisan unsa nila kadako o kagamay, duna sila'y luna sud sa korte," pamahayag ni Cortes.

Sila si Codera, Flores ug Cortes padayon pang mikumbati ning tulo ka bulan nga torneyo nga modalit og P500,000 nga ganti sa makampiyon.

Apan bisan ug unsa pa'y ilang maabot ug bisan unsa pa'y ilang makab-ot sa torneyo, ila nang nahatagan og bili ang papel nga ilang gikuptan isip haligi sa kusog ug tubod sa inspirasyon sa mga sumusulbong nga Sugboanong basketbolista.