Spurs mipasidungog ni Manu Ginobili

CEBU, Philippines – Pormal nga gipasidunggan sa San Antonio Spurs si Manu Ginobili kagahapon agi'g pagyukbo sa mabulukon niining karera nga gidayan-dayanan og upat ka kampiyonato sa NBA ug ingon man Olympic gold medal sa nasud niyang Argentina.

Tipik sa emosyonal nga seremonyas mao ang pagretiro sa  No. 20 jersey ni Ginobili didto sa AT&T Center sa San Antonio, Texas. Naghimo kini kaniya nga ikasiyam pa lamang nga player sa Spurs, kansang numero giretiro.

Apil sa mga mitimbaya sa mahinungdanong gabii ni Ginobili mao sila si Spurs coach Gregg Popovich ug ang duha ka kanhi niya teammates nga sila si Tim Duncan ug Tony Parker.

Gigulagway ni Parker si Ginobili nga usa ka talagsaong talento.

"There is no other word to describe you," matud pa ni Parker agi'g pagdayeg ni Ginobili. "You were so unique that even Pop didn't know what to do with you the first two years."

Sa iyang bahin, si Ginobili nagkanayon nga walay kasudlan ang iyang kalipay sa pagpasidungog kaniya sa Spurs uban ang pasalamat sa paghatag niini og  bili  sa  iyang mga natampo sa organisasyon sud sa dul-an duha ka dekada.

"It's just overwhelming. "I'm beyond, beyond appreciative," matud pa ni Ginobili, kansang kalipay nadoble human ang Spurs midaog batok sa Cleveland Cavaliers, 116-110.

Si Ginobili miduwa sa tibuok 16 niya ka tuig sa NBA uban sa Spurs.    Gikuha siya sa San Antonio isip 57th overall pick niadtong 1999 Draft, nakasilbe siya og 1,057 ka duwa diin siya mi-average og 13.3 points, 3.8 assists, 3.5 rebounds ug 1.32 steals matag duwa.

Siya maoy lider sa Spurs sa labing daghan nga napasud nga 3-pointers (1,495) ug ingon man sa steals (1,392).

Si Ginobili usa sa duha lamang ka players nga nakakolekta og kapin sa 800 ka rebounds, 800 ka assists ug 300 ka 3-points sa NBA playoffs. Ang laing usa mao si si LeBron James.