USPF, USJ-R daog sa Talisay beach volley
CEBU, Philippines – Ang University of Southern Philippines Foundation (USPF) ug ang University of San Jose-Recoletos (USJ-R) maoy naghari sa tagsa-tagsa nila ka dibisyon sa 2019 Talisay Landing Beach Volleyball Tournament niadtong Martes sa Aznar Beach Resort sa Barangay Poblacion, dakbayan sa Talisay.
Sila si Dan Adrian Garnica ug Jason Kent Imperial sa USPF mipakaging sa pambato sa Southwestern University-Phinma nga sila si Niño Mhil Pacinio, Rafol Sico ug Roy Ulan, 21-15, 21-11 aron sakmiton ang men's title.
Sa gubat alang sa ikatulong dapit, sila si Clifford John Nabre, Carl Edpan ug Airon Paul Cabase sa Cebu Institute of Technology-University mibuntog nilang Jonel Tabale, Jeri Pingoy ug Jay Mart Avancena sa University of San Carlos, 25-21.
Sa women's division, ang USJ-R milampos pagdepensa sa ilang trono luyo sa paningkamot nilang Krissia Caasi, Lyn Rose Densing ug Jamaica Adriano nga miwani nilang Crisley Ann Sucalit, Iris Tito ug Charisse Sungahid sa USPF, 21-16, 21-18.
Samtang sila si Jaslyn Geconcillo, Hovelita de la Silva ug Jelyn Aca-ac sa USC nalandig sa ikatulong puwesto human munasginhawang naka-eskapo batok nilang Chyne Mae Saberon, Janyl Fonseca ug Suzette Espinosa sa SWU-Phinma, 26-25, 27-26.
- Latest
