Rams, Silogan Ni Gian daog sa MSBC Season 5

CEBU, Philippines – Sila si Kido Cabrera, Jonathan Adlawan ug Sam Hermosa maoy milugwa nga mga bida sa dihang gipakuratan sa Rams ang defending champion Spartans, 90-86 sa Monday Squad Basketball Cebu (MSBC) Friendship Cup Season 5 diha sa Casal's Village gym sa Barangay Mabolo, Dakbayan sa Sugbo.

Si Cabrera, kanhi varsity player sa Univerity of Cebu (UC) Webmasters ug University of San Jose-Recoletos (USJ-R) Jaguars sa wala pa makaduwa kadiyot sa Valenzuela Classics sa Maharlika Pilipinas Basketball League (MPBL), maoy nangu sa Rams uban ang 17 puntos.

Miiskor si Adlawan og 15, samtang si Hermosa, usa ka All-Star forward sa iyang panahon uban sa University of San Carlos (USC) Warriors miamot og 13 puntos sa Rams nga migamit og hait nga opensiba sa endgame aron patiurukon ang Spartans.

Si Kevin Labay mibahog og 25 puntos ug si Ian Ortega, kanhi batos sa USC Warriors ug Southwestern University (SWU)-Phinma Cobras, mitali og 22 puntos sa pilderong Spartans.

Sa laing duwa, si Ror Paspie ug James Cabilino nagkumbinar og 35 puntos, samtang si Ace Ompok midugang og 16 puntos sa dihang gisugdan sa Silogan Ni Gian ang ilang kampanya pinaagi sa pagyabo sa VDrink Malunggay Juice, 82-71.

Kontrolado kaayo sa Silogan Ni Gian ang duwa gikan sa pagsugod ug wala na nila paginhawaa pa ang Juicer Makers sukad sila miposte og 61-50 nga labaw human sa tulo ka kuwarter.

Si Archie Brian Batua ug Ryan Llanos nagkumboya og 42 puntos, apan nakawang ang ilang paningkamot sa VDrink Juice Makers.