Nowitzki labaw na ni Chamberlain sa NBA scoring list
CEBU, Philippines – Napilde man tuod ang Dallas Mavericks sa New Orleans Pelicans, 129-125 sud sa overtime didto sa ilang korte, apan si Dirk Nowitzki gibayaw gihapon sa himaya human iyang naapsan si Wilt Chamberlain sa NBA all-time scoring list.
Ang 40-anyos nga German, kinsa miduwa sa ika-21 ug posibleng katapusan na niining season sa liga uban sa Mavs, nanginahanglan lamang og kuwatro puntos aron malabwan ang rekord ni Chamberlain nga mikolekta og 31,419 puntos sa mabulukon niyang karera.
Nakab-ot ni Nowitzki ang maong dungog human siya milansang og 16-foot jumper sa oras nga 8:33 sa unang kuwarter nga gikahimuot og maayo sa bagang duot sa ilang fans.
Si Nowitzki mitapos uban ang otso puntos nga naghatag kaniya sa ika-31,424 nga puntos sa iyang karera.
Gumikan niini, si Nowitzki mao na karon ang ikaunom nga all-time leading scorer sa NBA sunod nilang Michael Jordan, LeBron James, Kobe Bryant, Karl Malone ug Kareem-Abdul Jabbar.
- Latest
