Alab kuyaw matangtang sa unang dapit standing

CEBU, Philippines — Delikado nga mapalagpot ang defending champion Alab Pilipinas  sa unang dapit sa standing sa ASEAN Basketball League.

Gumikan kay ang Alab nakahiagum og duha ka sunod-sunod nga pilde ug nagbitbit na karon og 18-6 nga baraha.

May purohan pa  sila nga maapsan sa Formosa Dreamers sa Taiwan nga adunay 17-6 record. Kun modaog sa sunod nilang duwa, ang Dreamers maoy na ang No. 1 team ilabi na nga kaduha na nila napilde ang Alab sa elimination round.

Ang  Alab Pilipinas napilde sa Macau Black Bear, 84-114 sa miaging gabii. Ang nakapait kay ang  Fil-American point guard nga si Mikh McKinney maoy nangu sa Macan nga mipabuhagay og 43 puntos.

Si Alab coach Jimmy Alapag naalarma kay gusto niya nga maoy No. 1 sa playoffs aron  mas sayon ilang dalan paingon sa laing finals appearance.

Miangkon si Alapag nga nagkalisud sila sa nahibilin nilang mga duwa tungod kay nakahiagum og seryosong injury sa ulo ang ilang star import nga si Renaldo Balkman. 

Dili sab  maayo ang performance ni  reigning MVP  Ray Parks Jr. sa  miagi nilang mga duwa diin ni-average lang kini og 12.3 points.