Galaw ng makakalaban ni Pacquiao pag-aaralan na
MANILA, Philippines — Ngayon pa lang, pinag-aaralan na ng Team Pacquiao ang galaw ng mga posibleng makalaban nito upang mas maging madali ang pagbuo ng plano sa oras na magsimula ang training camp ni eight-division world champion Manny Pacquiao.
Wala pang opisyal na pangalan na makakalaban si Pacquiao.
Ngunit para kay chief trainer Buboy Fernandez, mas magandang simulan nang makabisado ang estilo, postura at estratehiya ng mga makakalaban nito.
Kabilang sa mga pinag-aaralan ni Fernandez sina Errol Spence Jr., Keith Thurman, Danny Garcia at Floyd Mayweather Jr. na mga matutunog na pangalang maaaring makaharap ni Pacquiao sa pagdepensa ng kanyang World Boxing Association (WBA) regular welterweight title.
“Hindi naman kami namimili ng kalaban. Depende pa rin ito sa usapan (nina Premier Boxing Champions’ Al Haymon at Pacquiao). Pero sa ngayon, mas mabuti na pag-aralan ang galaw nilang lahat na nasa listahan,” ani Fernandez.
Kung mabibigyan ng pagkakataon, knockout pa rin ang tinatarget ng Team Pacquiao.
Nauna nang nagpahayag sina Spence at Thurman na nais nitong makalaban si Pacquiao.
Kasalukuyang hawak ni Spence ang IBF welterweight crown habang bitbit naman ni Thurman ang WBA super welterweight belt.
- Latest
