Walay Milo Little Olympics

CEBU, Philippines – Sa labing unang higayon sukad kini namugna tulo ka dekada na ang milabay, walay mahitabong Milo Little Olympics karong tuiga.

Kini gumikan kay ang organizing Nestle Philippines temporaryo unang mipahunong sa tinuig nilang torneyo alang sa mga estudyanteng atleta sa elementarya ug sekondarya lukop nasud.

"The Milo Little Olympics will temporarily be put on hold this year to give way to our other sports advocacy projects," pasabot pa ni Nestle Phils. Sports Executive Lester Castillo.

Ang Milo Olympics nagsugod sa Manila niadtong 1998, apan  mikatap kini sa ubang rehiyon sugod niadtong 1996.   Gikan   sa    usa   ka rehiyonal nga kompetisyon, ang mga organizers mipasiugda og National Championships sa Little Olympics sugod niadtong 2009 dinhi sa Sugbo, apan naundang kini niadtong 2016. Nagpadayon hinuon ang rehiyonal nga aksiyon hangtod sa miaging tuig.

Bisan pa og wala na ang MLO, ang mga batan-ong atleta duna gihapo'y angayan nga lantawon sa unahan. Kini mao ang Milo Champ Camp ug Milo Barangay Liga.

Ubos sa Champ Camp nga ilang ipahigayon agi'g pagtambayayong sa Department of Education, ang mga atleta sa elementarya tudloan kun unsaon pagduwa ang pipila ka matang sa paugnat sa kusog.

Gikan sa Champ Camp, ang mga atleta mahatagan og oportunidad nga  makapakita sa ilang nakat-onan ug abilidad pinaagi sa Milo Barangay Liga.

"This is aimed to get more children into sports from the grassroots level," dugang pa ni Castillo.