Coaches clinic, basketball camp sa Lapu-Lapu City

CEBU, Philippines — Ang mga mahiligon og basketbol sa Dakbayan sa Lapu-Lapu makapahimus og duha ka mahinungdanong kalihukan nunot sa pagpahigayon sa coaches clinic ug training camp sa ilang dapit.

Ipahigayon ang coaches clinic  sa Marso 2-3, gikan sa alas-9 sa buntag hangtod sa alas-12 sa udto sa Lapu-Lapu City Sports Complex.

Ang maong mga kalihukan gipaluyohan sa lokal nga kagamhanan sa Dakbayan sa Lapu-Lapu ubos sa liderato ni Mayor Paz Radaza inabagan sa sports commission sa siyudad.   Mopadagan sa duha ka adlaw nga seminar/workshop mao ang notadong basketball coaches nga sila si Goldwin Monterverde, Rommel Rasmo ug Chelito 'Chakang' Caro.

Si Monteverde maoy head coach sa National University (NU) Bullpups nga nakampiyon og balik sa juniors division sa UAAP.

Usa sa mga assistant coaches sa Batang Gilas Team Pilipinas, si Monteverde mao sab ang head coach sa multi-titled Chiang Kai Shek College Blue Dragons.

Samtang sila si Rasmo ug Caro migiya sa Sacred Heart School-Ateneo de Cebu (SHS-AdC) Magis Eagles ngadto sa makasaysayanong four-peat sa Cebu Schools Athletic Foundation, Inc. (CESAFI). Si Caro mao sab ang mopasiugda sa libreng basketball camp karong Marso 9 didto sa San Vicente Gym sa isla sa Olango. Ang mga partisipante makadawat og libreng bola ug ingon man mga medyas ug sinina gikan  sa Nike.

Alang sa dugang detalye, kadtong mga interesado mahimong mokontak ni coach Carz sa 0919-9221922.