Ane apil nangandam sa malisud nga hagit

CEBU, Philippines — Human makapugnit og bulawang medalya sa Cebu Provincial Meet sa miaging bulan, tinguha sa batan-ong gymnast nga si Ane Josephine Colina Apil nga makatunol og medalya sa Cebu Province sa 2019 Central Visayas Regional Athletic Association (CVIRAA) Meet nga gikatakda karong Pebrero 16-22 didto sa dakbayan sa Dumaguete.

Ang sixth grader sa Green Rose Center for Academe sa lungsod sa Compostela, amihanang bahin sa Sugbo naka-angkon na sab og higayon nga morepresentar sa Sugbo sa CVIRAA human midaog og usa ka gold, duha ka silver ug usa ka bronze medal sa Provincial Meet nga gipahigayon didto sa Carmen, Cebu niadtong Enero.

Sa labing una niyang pagkumbati sa CVIRAA sa miaging tuig didto sa Tagbilaran City, Bohol, ang 11-anyos nga si Apil nakatunol og bronze sa Cebu Province. Gusto ni Apil nga palambuon pa ang iyang performance ning higayona.

Malisud nga hagit ang nagpaabot kaniya sa unahan, apan masaligon si Apil sa iyang kahigayonan  uban ang panghinaut nga makarepresentar siya sa Central Visayas sa Palarong Pambansa sa ugma damlag.

Sa edad nga sayes anyos, nadasig si Apil nga makat-on og gymnastics diin ang Amerikanang artistic gymnast ug Olympic champion nga si Simone Biles maoy iyang inspirasyon.

Nagsugod siya og salmot og mga kompetisyon niadtong tuig 2017.

Sa mubo nga panahon, mihimo dayon siya og kasikas pinaagi sa pagdaog og gold medal sa district meet ug dayon sa provincial meet sa wala pa mikuhit og bronze sa CVIRAA sa miaging tuig didto sa Bohol.  Sa susamang tuig, naka-bronze sab siya sa Milo Little Olympics. Naangkon ni Apil ang tanan gumikan sa iyang paningkamot ug determinasyon.

Sama sa ubang batan-on nga mga atleta, si Apil duna na'y gisilsil nga ambisyon sa iyang dughan ug alimpatakan bisan sa linghod pa niyang pangedaron. (BANAT NEWS)