Palicte midaog apan rematch nilang Nietes hanap

CEBU, Philippines – Ang Pinoy'ng boksidor nga si Ashton 'Mighty' Palicte yanong midaog pinaagi sa second TKO batok sa kanhi wa'y pildeng Puerto Rican nga si Jose Martinez sa ilang WBO super flyweight title eliminator didto sa Viejas Casino and Resort sa Alpine, California.

Dominante kaayo si Palicte nga mikalukapa ni Martinez tulo ka higayon sa ikaduhang hugna hinungdan nga nahuman og sayo ang gikatakda unta nilang 12 ka hugna nga away.

"Masaya ako, kasi siyempre yung sacrifice ko, grabe," matud pa ni Palicte sigun sa taho ni Steve Angeles sa ABS-CBN News. "Wala akong Christmas, wala akong New Year, pati birthday ng misis ko, wala ako, birthday ko andito pa din ako."

Gisaytan karon ni Palicte ang 'rematch' batok sa kababayan niining si Donnie 'Ahas' Nietes nga mipilde sa Hapon nga si Kazuto Ioka pinaagi sa unanimous decision niadtong bisperas sa Bag-ong Tuig aron sakmiton ang WBO super flyweight title ug mamahimong ikatulo pa lamang nga Pinoy'ng boksidor sa kasaysayan nga nakaangkon og dungog isip four-division world  champion  sunod nilang   Manny  Pacquiao ug Nonito Donaire Jr.

Apan hanap pa sa diyes panas nga mag-abot sila og usab kay si Nietes na man mismo ang mideklarar nga dili na siya makigharong pa og balik ni Palicte.

Nakontrobersiyal ang una nilang engkuwentro niadtong Septiyembre sa miaging tuig human kini gideklara nga tabla ang ilang away. Apan  si Nietes miinsister nga klaro kaayong siya'y maoy daog sa maong away sab sa kadaghanan.