Registration alang sa MCCI caging gisugdan na
CEBU, Philippines – Abli na ang registration alang sa 2019 Mandaue Chamber of Commerce and Industry (MCCI) Basketball Tournament nga gikatakdang mosikad karong Mayo 26 diha sa Mandaue City Cultural and Sports Complex.
"This is our plan for improving the camaraderie and sportsmanship among the member companies," matud pa ni event organizer Mark Anthony Ynoc, Board of Director ug Chairman for Membership sa MCCI.
Segun sa lagda sa liga, kadto lamang mga kompaniya nga sakop sa MCCI ang makaapil. Gawas niini, ang matag sakop sa team kinahanglan nga empleyado sa kompaniya nga ilang girepresentahan.
Gawas sa tropeyo, ang makampiyon mobulsa og P10,000, samtang ang mopahiluna sa ikaduha ug ikatulong dapit modawat og P7,000 ug P5,000.
Ang entry fee nagkantidad og P10,500 matag team. Kadtong mga interesado gihatagan kutob lamang karong Marso 30 aron magparehistro.
Alang sa dugang mga detalye, mahimong mokontak sa MCCI Secretariat (343-3491 o 236-8245) o dili ba tawga silang Cyruz (0917-3147912) ug Renzo (0917-7736087).
- Latest
