Ball dili kaduwa kapin usa ka buwan

CEBU, Philippines — Dili makaduwa sud sa upat ngadto sa unom ka semana ang pambatong guwardiya sa Los Angeles Lakers nga si Lonzo Ball gumikan sa injury sa walang  tiil niini.

Si Ball giagak pagawas sa korte sa iyang mga teammates nga sila si Michael Beasley ug Lance Stephenson sa ikatulong kuwarter atol sa kapildihan sa Lakers batok sa Rockets sud sa overtime didto sa Houston. Na-injured ang left ankle ni Ball human sila magbangga ni James Ennis sa Rockets. Sa iyang paglandig, gikuptan ni Ball ang wala niyang tiil sa wala pa mibarog nga nagtakiang.

Human gihiling, nasuta nga si Ball nakahiagom og Grade 3 sprain. Ipaubos siya sa rehabilitasyon ug gibana-bana nga dili makaduwa kapin sa usa ka bulan.

Dili hinuon bug-at ang problema sa Lakers gumikan kay lagmit makabalik na man og duwa sila si LeBron James ug Rajon Rondo karong semanaha. (BANAT NEWS)