Lady Altas, Lady Stags sa krusyal na panalo

MANILA, Philippines —  Krusyal na panalo ang parehong aasamin ng University of Perpetual Help System Dalta at San Sebastian College-Recoletos sa kanilang pagtutuos ngayong araw sa NCAA Season 94 women’s volleyball tournament sa The Arena sa San Juan City.

Lalarga ang mainit na bakbakan ng Lady Altas at Lady Stags sa alas-12 ng tanghali habang maghaharap naman ang College of Saint Benilde at Mapua University sa alas-2 ng hapon.

Kapwa naghahangad ang Perpetual Help at San Sebastian na makuha ang huling tiket sa Final Four matapos kubrahin ng Arellano University (8-0), San Beda University (7-1) at Benilde (7-1) ang unang tatlong silya sa semis.

Bahagyang malapit ang Lady Altas na may 4-3 marka sa No. 4 spot habang magkasama ang San Sebastian at Jose Rizal University sa No. 5 bitbit ang parehong 4-4 kartada.

Pormal na maibubulsa ng Perpetual Help ang huling puwesto sa Final Four kung mananalo ito sa San Sebastian at matatalo ang Jose Rizal sa kanilang huling laro.

Kaya naman inaasahang ibubuhos ng Lady Altas ang lahat ng lakas nito para masiguro ang pag-entra sa susunod na yugto.

Galing ang Perpetual Help sa 25-18, 16-25, 19-25, 24-26 kabiguan sa Arellano noong Huwebes para bahagyang manganib ang kanilang Final Four bid.

Papalo para sa Lady Altas sina Cindy Imbo, Inna Suico at Bianca Tri­poli para mapalakas ng kanilang tropa ang tsansa sa semis.