Geobert merchandise kampiyon sa Gary Rojas Friendship Cup
CEBU, Philippines — Ang fourth quarter rally ug solidong depensa maoy nahimong taytayan sa Geobert Merchandise pagpilde sa Princess and Faith, 94-93 aron madaog ang kampiyonato sa Gary Rojas Friendship Cup 3rd Conference didto sa Sta. Luca gym sa Consolacion sa miaging bulan.
Anaa na unta sa mga kamot sa Princess ang daog dihang labaw sila og 12 puntos sa katapusang dos minutos, apan ilang giusikan ang kahigayonan diin nakahimo sila og daghang mga turnovers hangtod nga nilabaw ang Geobert Merchandise sa himalatyong segundos, 94-93 kortesiya ni Jake Miñoza.
Si Miñoza nga maoy Finals MVP miposa og 23 puntos aron mangu sa scoring sa Geobert Merchandise ni Nonoy Sacut. Sila si Harold Javier ug Dwight Gonzaga nagtampohay og 18 puntos. Si Rey Gonzaga Jr. miamot og 16 puntos, samtang si Paulo Dalumpines mitampo og 14 puntos sa kadaogan sa team ni Nonoy Sajot.
Ang Princess and Faith gipangulohan sab ni Doding Tolentino nga mburak og 35 puntos, gisundan ni Sidney Lasprilla nga adunay 28 punots. Sila si Bryant Villahermosa ug JR Tarrosa nagkumboya'g 24 puntos.
PUNTOS MATAG USA
Geobert Ent. (94) – Miñoza 23, Javier 18, D. Gonzaga 18, R. Gonzaga Jr. 16, Dalumpines 14, Juanillo 5.
PRINCESS and Faith (93) – Tolentino 35, Lasprilla 28, Villahermosa 13, Tarrosa 11, Gela 6.
- Latest
