Parks Jr. dili buhian sa Blackwater

CEBU, Philippines — Mitingog na si Blackwater Elite team owner  Dioceldo Sy  ug  iyang giklaro nga dili tinuod nga i-trade nila sa laing koponan ang No. 2 pick ug ABL MVP nga si Ray Parks Jr.

Ang pamahayag ni Sy migawas usa ka semana human miingon si Parks nga naglibog siya kun  asa siya nga koponan moduwa sa sunod season sa PBA. 

Nasayran nga   mikatap ang mga balita nga i-trade sa Blackwater ang kanhi NBA D-League cager sa Meralco Bolts o TNT KaTropa.

Hinuon, si Sy mibasura niini ug miingon nga hatagan nila og three-year contract si Parks nga magkantidad og P10.4 million.

Wala pa hinuon pormal nga mipirma sa kontrata si Parks sa Elite, apan  segurado si Sy nga musul-ob og uniporme sa Blackwater ang Fil-American sensation sa bag-ong season sa PBA nga sugdan sunod buwan.

Wala pa hinuon maklaro ni Sy kun  moduwa na ba dayon si Parks  sa All-Filipino Cup, ang unang conference sa PBA tungod kay  moduwa pa kini sa Alab Pilipinas sa ABL.