Guwardiya sa Heat dili kaduwa duha ka buwan
CEBU, Philippines — Dili kaduwa sud sa duha ka bulan ang pambatong guwardiya sa Miami Heat nga si Goran Dragic human maoperahi ang tuong tuhod niini kagahapong adlawa.
Si Dragic nga nakapalta og 12 sa miaging 14 ka duwa sa Heat gumikan sa maong injury nga iyang nahiaguman, gipaabot nga makabalik og duwa unya inig human sa NBA All-Star Game break sa Pebrero 15-21 sunod tuig.
Sa 14 niya ka duwa karon nga season, si Dragic usa sa mga haligi sa Heat uban ang average nga 15.3 points 4.9 assists ug 3.1 rebounds.
"He was getting treatment around the clock and it just wasn't responding," matud pa ni Heat coach Erik Spoelstra. "This solution is the most promising. We will deal with it and he will be back this season."
Ang 32-anyos nga si Dragic mitabang sa Slovenia pagsakmit sa EuroBasket title didto sa Turkey.
Gibayaw siya nga NBA Most Improved Player sa dihang nagduwa pa uban sa Phoenix Suns niadtong 2014 ug nakaangkon og luna sa NBA All-Star Game sa labing unang higayon sa miaging tuig.
- Latest
