Fury nibalik na ang kamangtas
CEBU, Philippines — Midaog gihapon ang E&F Surplus bisan og wala na ang 'Big 3' niini nga atua na magtikawtikaw sa laing koponan.
Ang E&F Surplus mipukan sa Union Galvasteel, 87-74 sa Consolacion Lilo-an Basketball Association (CLBA) Season 1 niadtong Biyernes didto sa GT Academy gym sa Tayud, Lilo-an.
Ang team owner nga si Fury 'Triggerman' Trazona nagbangis og maayo sa maong duwa ug gipangulohan ang E&F Surplus pinaagi sa iyang 19 puntos.
Gawas nga nabalik ang iyang kamangtas, si Trazona mao sab ang mitapak sa puwesto sa nawalang tulo niya ka players aron tunolan ang iyang koponan og 3-2 nga baraha.
Sila si Tata Betinol, Ken Nuñez ug Darwin Ursal pareho sab nga miiskor og double figures sa E&F Surplus nga maoy nidominar gikan sa pagsugod hangtod nahuman ang duwa.
Ang 3-2 nga Union Galvasteel gipangulohan ni Bobong Tiongson nga mipabuto og 22 puntos, gisundan ni Marvin Boyles sa iyang 15 puntos.
Sa laing duwa, ang Victorious Eagle milubong sa J&J Surplus, 94-78 alang sa ilang 3-1 nga baraha.
Ang team owner mismo nga si Danrex Bayonla ang nangulo sa kadaogan uban ni Silorio nga mipabuhagay og 20 puntos matag usa. Pareho sab nga miiskor og 17 puntos sila si RJ Jalang ug Aljun Noble sa maong kadaogan.
Anugon kaayo ang 29 puntos ni Larry Oroyan kay ang J&J Surplus nahagba ngadto sa 2-2 win-loss record.
Ang team owner nga si Henry Agbon ug Romnick dela Rama parehong mikamada og 12 puntos, samtang si Jomar Tiwan miantog og 11 puntos sa napildeng koponan.
Sa lain pang aksiyon, midaog na gyud ang St. Augustine human ilang gipaluhod ang Gladiator, 68-63.
Gipangulohan ni Louie Pepito ang daog pinaagi sa iyang 14 puntos, si Troy Berame miamot og 12 puntos, samtang sila si Elper Sison ug Albert Inoc mitampo'g 11 ug 10 puntos matag usa.
Upat sab ka players ang miiskor og double figures sa Gladiator pinangulohan ni F. Pepito sa iyang 15 puntos.
Ang St. Augustine ug Gladiator parehong nagbitbit og 1-4 records ning maong torneyo nga gipaluyohan sa Union Galvasteel.
Ang mga duwa gipadagan ni league commissioner Fury Trazona sa abag nilang Harris Perez, Noy Joe Velez ug Choy Pilapil.
PUNTOS MATAG USA
Unang duwa:
E&F Surplus (87) – Trazona 19, Betinol 17, Nuñez 14, Ursal 10, A. Sabang 6, K. Sabang 6, Igoy 5, Caballes 2, Pepito 2.
UNION Galvasteel (74) – Tiongson 22, Boyles 15, Dejarme 9, Mantos 8, Obial 6, Arlabs 3, Mantos 2, Judaya 2, Lozano 2,
Gaite 2.
Ikaduhang duwa:
VICTORIOUS (94) – Bayonla 20, Silorio 20, RJ Jalang 17, Noble 17, Sasing 6, Lascuna 6, Jalang 6, Calipes 2.
J&J Surplus (78) – Oroyan 29, Dela Rama 12, H. Agbon 12, Tiwan 11, Casper 6, Cabahug 5, Astillero 4, Adolfo 2.
Ikatulong duwa:
ST. Augustine (68) – Pepito 14, Berame 12, Sison 11, Inoc 10, Commendador 7, Rondina 6, Onting 4, Janiola 2, Munez 2.
GLADIATOR (63) – F. Pepito 15, Ursal 14, V. Pepito 13, Basaca 11, Jugalbot 6, G. Pepito 2, Normandia 2, J. Jugalbot 2.
- Latest
