Magnolia, Alaska series lisud tag-anon

CEBU, Philippines – Nagkahiusa ang mga huna-huna sa  PBA coaches nga lisud tag-anon kun asa sa Magnolia Hotshots ug Alaska Aces ang modaog sa PBA Governors Cup finals series nga sugdan sa Disyembre 5.

Si Phoenix Fuel Masters coach Louie Alas nagkanayon nga pulos adunay kusog nga line-up ug nagkadaiyang patyanan ang matag koponan ug mao kini ang hinungdan nga dili pa siya makapili kun asa sa duha ang adunay pabor.

"Strength and weaknesses almost even. Kung sino ang less turnovers at mas marami ang offensive rebounds, siya ang mananalo," matud pa ni Alas sa PBA.com.

Ang coach sa San Miguel Beermen nga si Leo Austria miingon nga moabot sa Game 7 ang serye ug magdepende ang resulta  kun  kinsa ang magpabiling himsog ilabi na nga pulos adunay mga injuries ang mga key players sa Alaska ug Magnolia.

Ang duha ka coach nagkauyon usab nga dako og papel ang mga imports sa mamahimong resulta sa duwa. 

Si Mike Harris sa Alaska ug Romeo Travis sa Magnolia pulos adunay abilidad nga mopuntos og kapin sa 30 sa usa ka duwa  ug  magdepende ang resulta sa ilang performance. (BANAT NEWS)