Team Pilipinas pasado ni Guiao
CEBU, Philippines – Wala man nila naharus ang duha ka tune-up game batok sa Jordan, si national team coach Yeng Guiao kompiyansa sa Team Pilipinas nga mudaog sa duha ka nagsingabot nilang sangka sa 2019 FIBA World Cup qualifiers batok sa Kazakhstan ug Iran.
Si Guiao wala pa kapili sa final 12 gikan sa dul-an 20 ka players nga lakip sa national team pool, apan nalipay siya tungod kay maisip nga solido ang koponan bisan kinsa pa ang iyang pilion.
Ang maong mga sakop sa Team Pilipinas mihimo na og dul-an usa ka buwan nga ensayo pangandam sa World Cup qualifiers diin una nilang atubangon ang Kazakhstan karong Nobiyembre 30 didto sa MOA Arena.
Si Guiao miingon nga dili pa perpekto ang ilang mga gameplay ug daghan siya nakit-an buslot, apan grabe ang kalambuan sa iyang giporma nga koponan nga gipangulohan ni PBA MVP JuneMar Fajardo ug veteran national team guard Jayson Castro.
“Our execution is still not that good. We have to fine tune our execution on both ends,” matud pa ni Guiao sa PBA.com.
Lakip sa mga gipilian sa Final 12 mao sila si Paul Lee, Ian Sangalang, Kai Sotto, Ricci Rivero, Scottie Thompson, LA Tenorio, Japeth Aguilar, Greg Slaughter , Christian Standhardinger, Arwind Santos, Alex Cabagnot, Marcio Lassiter, Troy Rosario, Poy Erram, Beau Belga, Gabe Norwood ug Matthew Wright.
Sa laing bahin, gidugang ni Guiao nga ganahan unta kaayo ilakip ang Fil-foreign scorer nga si Stanley Pringle sa koponan, apan maglisud na siya tungod kay anaa si Standhardinger nga maoy giisip nga naturalized player ug dili mamahimo nga dunganon ang duha.
- Latest
