Magnolia plano mag-ilis og import

CEBU, Philippines — Miangkon si veteran import Romeo Travis nga naglisud siya pagrekober sa iyang injury ug  dili pa siya  kaseguro kun  makabawi na siya sa dili pa magsugod ang "best-of-seven" finals series sa iyang koponan nga Magnolia Hotshots batok sa Alaska Aces sa Disyembre 5.

Nagpasalamat si Travis tungod kay nahatagan pa siya og pipila ka semana nga pahuway sa dili pa moduwa og balik, apan miangkon nga  nagsakit pa gihapon ang iyang hamstring injury nga iyang nahiaguman atol sa semifinals batok Barangay Ginebra.

Wala pa hinuon sa huna-huna sa coaching staff sa Hotshots nga mangita na og replacement import alang ni Travis, apan si head coach Chito Victolero miingon nga gitun-an na nila ang tanang posibleng mahitabo sa dili pa ang Game 1.

Si Travis, kinsa usa ka suod nga higala ug kanhi teammate sa high school ni NBA superstar LeBron James, nag-average og kapin sa 30 puntos lakip na ang iyang 50 puntos atol sa Game 4 atol sa ilang pagtagak sa Ginebra.

Ang 6-foot-5 nga si Travis nagkanayon nga ipugos gihapon niya og duwa bisan pa og dili siya 100 percent sa Game 1, apan nanghinaut lang siya nga makaduwa siya og tarong bisan pa sa injury.

Ang Magnolia nagkinahanglan ni Travis sa finals ilabi na nga ang Alaska adunay lig-ong import nga si Mike Harris. (BANAT NEWS)