Lions handa sa resbak ng Pirates
MANILA, Philippines — Susubukan ng nagdedepensang San Beda University na tapusin na ang serye sa pagharap nito sa Lyceum of the Philippines sa Game 2 ng NCAA Season 94 men’s basketball tournament best-of-three championship series sa Mall of Asia Arena sa Pasay City.
Asahan ang matinding bakbakan sa pagitan ng Red Lions at Pirates sa alas-4 ng hapon matapos ang duwelo ng College of Saint Benilde-La Salle Greenhills at Mapua sa ala-una at ng awarding ceremony sa alas-3.
Sinamantala ng San Beda ang pagkawala ni Lyceum ace CJ Perez para kubrahin ang 73-60 panalo sa series opener sa Game 1 noong nakaraang linggo.
Ngunit mapapalaban ang Red Lions sa Game 2 dahil magbabalik na si Perez na pinatawan ng suspensiyon ng NCAA Management Committee matapos mabigong ipaalam ang kanyang aplikasyon sa PBA Annual Rookie Draft.
Hawak ni Perez ang averages na 18.7 points, 8.4 rebounds, 4.0 assists at 3.3 steals kaya’t malaking kawalan ito para sa Lyceum sa Game 1.
“They’re a different LPU team without CJ (Perez) but we really prepared against CJ and we’ll see what happens,” wika ni San Beda coach Boyet Fernandez.
Sa kabila ng pagkawala ni Perez, mabangis pa rin ang Pirates na nagawang makabalik mula sa 27 puntos na pagkakabaon sa third quarter.
Subalit bigo ang Lyceum na masustenihan ang magandang laro nito para tuluyang ipaubaya ang series opener sa San Beda.
Kaya naman inaasahang mas mabagsik ang Pirates na gigil na makaresbak upang maipuwersa ang rubber match sa serye.
“We’re excited to have him back,” ani Lyceum mentor Topex Robinson.
Ipaparada ng San Beda sina graduating players Robert Bolick, Javee Mocon, Jeramer Cabang at Cameroonian center Donald Tankoua.
Tatapatan ito ng Lyceum kung saan makakasama ni Perez sa ratsada sina Jaycee Marcelino, Jayvee Marcelino, Jesper Ayaay at Cameroonian big man Mike Nzeusseu.
- Latest
