Petalcorin napakyas sa misyon
CEBU, Philippines — Pakyas si Pinoy boxer Randy Petalcorin sa iyang tinguha nga mamahimong world champion human siya kulataha ni Nicaraguan Felix Alvarado niadtong Lunes sa gabii didto sa Midas Hotel sa Pasay City.
Mangtas kaayo ang gipakitang abilidad sa 29-anyos nga si Alvarado nga mitumba ni Petalcorin tulo ka higayon sa ikapitong hugna aron sakmiton ang bakanteng IBF light flyweight title.
Nindot unta kaayo ang gipakitang labok ni Petalcorin sa unang hugna diin iyang gisurprisa ang iyang kontra, apan yano rang gikaon ni Alvarado ang iyang mga kinumo.
Human niini, si Alvarado na sab ang milusad sa iyang mga ataki ug pagkahuman sa ikaduhang hugna, klaro kaayong naluya na si Petalcorin.
Gipahimuslan ni Alvarado ang kahigayonan aron paglatos ni Petalcorin hangtod nga iya kining gitiwasan sa oras nga 2:04 sa ikapitong hugna.
Si Alvarado nagbitbit na karon og 34-2 record uban ang 30KOs, samtang si Petalcorin nadakin-as ngadto sa 29-3-1 uban ang 22KOs.
- Latest
