Petalcorin mosuway og labni sa IBF belt

CEBU, Philippines — Si Randy Petalcorim mosuway nga mamahimong ikatulo nga Pinoy world boxing champion sa kasamtangan sa dihang iyang sangkaon ang Nicaraguan nga si Felix Alvarado karong gabii didto sa Midas Hotel and Casino Tent sa Pasay City.

Seguradong malingaw ang mga manan-aw gumikan kay ang ilang masaksiha gubat man sa duha ka eksplosibong mga boksidor.

Laraw ni Petalcorin nga malinya iyang pangan uban nilang Manny Pacquiao (WBA welterweight) ug Jerwin Ancajas (IBF super flyweight) isip mga Pinoy'ng kampiyon sa boksing ning panahona.

Si Petalcorin nagbitbit og 29-2-1 win-loss-draw record uban ang 22KOs, samtang si Alvarado mas bangis bitbit ang 33-2 nga baraha uban ang 29KOs.

Pulos mangtas ang duha ka protagonista. Si Petalcorin midaog sa katapusan niyang unom ka away apil na ang pagpalukapa niya ni Jade Yagahon niadtong Mayo, samtang si Alvarado mipakamang og 14 sa katapusan niyang 15 ka mga kontra. (BANAT NEWS)