Baby Lancers, UC jrs. magpinaksitay na sa titulo

CEBU, Philippines – Sugdan na sa defending champion University of the Visayas (UV) Baby Lancers ug University of Cebu (UC) Junior Webmasters ang ilang 'best-of-three' championship series sa juniors division sa 18th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.

Mag-abot sila sa alas- 6:45 sa gabii human sa knockout game alang sa ikatulong dapit tali sa University of San Jose-Recoletos (USJ-R) Baby Jaguars ug University of Southern Philippines Foundation (USPF) Baby Panthers sa alas 5:15 sa hapon.

Kay namungingi og talento ubos sa pagpangu nilang Gabriel Cometa, Joshua Yerro ug Berien Anthony Laurente, ang Baby Lancers  gipang-lantawan nga mosubli sa ilang nakab-ot sa miaging season diin ilang gilangkat ang titulo bitbit ang perpektong 12-0 record.

 Sila si coach Jun Pepito ug Magic Bucao sa UV dunay sa'y lain pang hait nga hinagiban nga mao sila si Mar Leandro Actub, Albert Sacayan, Dave Basalo ug Samuel Melicor.

Labaw sa tanan, ang Baby Lancers nakabentaha kun kompiyansa maoy hisgutan gumikan kay sila man maoy mipatilaw sa labing una ug bugtong pa lamang nga pilde sa Junior Webmasters sa iskor nga 78-68 niadtong Septiyembre 9.

Samtang ang Baby Lancers naglaraw sa ikaduha nilang sagunson nga korona sukad sila naka-grandslam  niadtong 2003-2005, ang Junior Webmasters nagpanikad nga putlon ang usa ka dekada nilang huwaw sa trono.

Ang Junior Webmasters mitaak sa finals sa ikatulong higayon sa miaging upat ka tuig. Apan nasugamak sila sa Sacred Heart School-Ateneo de Cebu (SHS-AdC) Magis Eagles sud sa duha ka sunod-sunod nga higayon niadtong 2015 ug 2016.

Nanghinaut si coach Brad Samonte nga sa ikatulong higayon suwertihon na sila.

Ang Junior Webmasters dunay rason nga magpositibo sa ilang panglantaw gumikan sa presensiya ni Isaiah Blanco, ang anak ni kanhi PBA star Dondon Hontiveros nga naghatag kanila og nindot nga liderato.

Hinuon, aron molampos ang Junior Webmasters sa ilang misyon, si Blanco nanginahanglan og igong suporta gikan nilang Jerick Ranido, Jasper Pacaña, Justin Mondares, James Incio, Joshoa Gellacone  ug John Dajab.