Walker gipamulta P20,000 sa PBA
CEBU, Philippines – Gipamulta og kapin P20,000 ang import sa Blackwater Elite nga si Henry Walker isip silot kaniya sa PBA tungod sa iyang paglabay og 'mouthguard' ngadto sa referee.
Ang ex-NBA cager nga si Walker wala kauyon sa tawag sa reperi atol sa ilang duwa batok Magnolia Hotshots sa miaging semana. Sa iyang kasuko, gipagawas ni Walker ang iyang 'mouthguard' ug gilabay kini niya ni referee Nino Cortez.
Nagsige sab og tagawtaw si Walker hinungdan gipagawas siya sa playing court.
Sa iyang bahin, si PBA Commissioner Willie Marcial miingon nga dili kinahanglan magpadala ang import sa iyang emosyon ug likayan niini ang pagbuhat og mga bati nga lihok sulod sa korte.
Si Walker maoy ikaduhang import nga gisilotan sa PBA sunod ni Kevin Murphy sa San Miguel Beermen nga gipabayad og P5,000 human gibitik ang liog ni Phoenix forward Calvin Abueva niadtong Domingo.
- Latest
