Streamline nakadaog na gyud sa E-Leagues
CEBU, Philippines — Ang Streamline Kangaroos nagsandig sa eksplosibong salida ni Geory Apas aron paludhon ang Bombardier Grey Wolves, 65-55, alang sa labing una nilang daog sa EVO League sa Tanduay Athletics E-Leagues for Basketball Season 14 niadtong Sabado didto sa City Sports Club-Cebu gym.
Si Apas mikadlit og solidong double-double uban ang 23 puntos ug 19 ka rebounds nga iyang gipalamanan og upat ka steals ug tulo ka assists aron tabangon ang Kangaroos sa walo ka sagunson nilang pilde.
Dako sab og natampo sa Streamline si Socratis Rama nga dunay 19 puntos.
Sila si Gil Paulo Valencia ug Franklin Cuizon nagkombinar og 22 puntos apan way nahimo gumikan kay ang Grey Wolves nakatilaw sa ikasiyam nilang sunod-sunod nga pilde ug 10 sa kinatibuk-an sud sa 11 ka duwa.
Sa lain pang mga aksiyon sa EVO League, si Rusty Eleazar Salas mitagak og 15 puntos, 14 ka rebounds ug tulo ka blocks aron dagiton ang Dynnino Jets ngadto sa 63-58 nga kadaogan batok sa Optum Knights, samtang si Robert Rebano mipabuto og 29 puntos ug si Steven Cabanday mitali og 23 sa dihang gibuntog sa Tech Mahindra Tech Mighties ang Results Manila Spartans, 78-74.
Ang Jets mi-inat sa ilang record ngadto sa 5-3, samtang ang Tech Mighties nagbitbit na karon og 7-2 nga marka.
Sa bugtong duwa sa Elite Classic, ang ePerformax Reds moputol sa upat ka sagunson nilang pilde human gipatikalbong ang QBE Generals, 66-60.
Si Robert Gilo dunay 21 puntos, samtang si Nolan de la Peña ug Jan Pope Ravina nagkumboya og 39 puntos aron agakon ang Reds ngadto sa ikatulo pa lamang nila nga daog sa 10 ka duwa. Ang Generals misukarap sa ikaunom niining pilde nga gi-atbangan og duha lamang ka daog. (BANAT NEWS)
- Latest
