Tabunok hari sa juniors div. sa Gullas Cup
CEBU, Philippines — Si Raffy Bacasmas mikadlit og 20 puntos, samtang lain pang tulo ang mirehistro og double figures alang sa Tabunok nga milubong sa Lawaan III, 96-70 aron paglangkat sa kampiyonato sa juniors division sa Talisay City Sports Commission (TCSC) 2018 Mayor Eduardo 'Eddiegul' R. Gullas Cup Inter-Barangay Basketball Tournament niadtong Biyernes sa gabii diha sa Talisay City Sports Complex.
Si Oudy Francis Acedo miamot og 16 puntos ug sila si Aaron Bucao ug Aaron Jeff Nacario parehong mi-iskor og 14 puntos sa Tabunok nga kontrolado kaayo ang duwa sukad milansang og 46-34 nga labaw sa halftime.
Bisan og komportabli kaayong naglabaw human sa tulo ka kuwarter, 69-50, padayong nanginit ang Tabunok hinungdan sa pagkulit niini og 26 puntos nga demolisyon. Si Bacasmas sa Tabunok maoy gikoronahan isip Most Valuable Player. Giduyogan siya sa Mythical Five sa iyang mga teammates nga sila si Oudy Francis Acedo ug AJ Nacario ug nilang Jay Deiparine ug Ruel Barliso sa Lawaan III.
Ang Tabunok mibulsa og P25,000 sa ilang kadaogan, samtang ang Lawaan III nga gipangulohan ni Jay Deiparine nga mikulit og 12 puntos nakadawat og P20,000.
Sa gubat alang sa ikatulong dapit, sila si Ronan Briones ug Han Callow Bolo nagkumbinar og 42 puntos sa Pooc nga milubong sab sa Tanke sa iskor nga 94-76.
Si Rubino Singson, Jr. mitampo og 11 puntos, samtang sila si Hearvey Bolo ug Shaundy Alipio nagkumboya'g 17 puntos sa Pooc nga wala na mopaginhawa pa sa Tanke human sila miabante, 27-13.
Si Ryan Mar Obrero maoy nangu sa Tanke uban ang 19 puntos, samtang si Cyd Paulo Penas ug Jommelito Dacua mitali og 15 ug 13 puntos sa pilderong kawsa.
PUNTOS MATAG USA
(For third)
Pooc (94) – Briones 22, Bolo 20, Singson 11, Bolo 9, Alipio 8,Baculta 6, Lastimado 6, Balorio 4, Ybañez 4, De la Rama 2, Mayola 2.
Tanke (76) – Obrero 19, Penas 15, Dacua 13, Beduya 9, Abiog 7, Legaspi 4, Socias 3, Labagala 2, Obrero 2, Cabanes 2.
CHAMPIONSHIP
Tabunok (96) – Bacasmas 20, Acedo 16, Bucao 14, Nacario, 14, Bucao 9, Macabale 7, Rafaeles 6, Famulagan 4, Tan 4, Coyoca 2.
Lawaan III (70) – Deiparine 12, Canillo 9, Lasquites 9, Butas 8, Barliso 7, Sigue 6,Anocop 5, Canoy 4, Nacor 4, Algoso 3, Serra 2, Labalan 1.
- Latest
