Meralco pilde na sab

CEBU, Philippines — Napilde sa ikaduha nilang sunod-sunod nga higayon ang Meralco-Pilipinas human miyukbo ngadto sa Alvark Tokyo, 84-73 sa FIBA Asia Champions Cup kagahapon didto sa Thailand.

Human mapilde sa una nilang duwa batok sa host team Mono Vampire Thailand, 92-100 niadtong Huwebes, ang Meralco naninguha unta nga makabawi kagahapon aron mahayagan ilang tsansa sa playoffs, apan wala sila kapugong sa import sa Japan nga si Alex Ryan Kirk hinungdan nga mirehistro kini og 23 puntos ug 11 ka rebounds.

Milabaw pa ang Pilipinas sa halftime sa pagpangulo nila ni Allen Durham ug Diamond Stone, apan nagkamang ilang scoring sa sayong bahin sa fourth period nga gisabayan usab sa pagbuto sa opensa sa Japan.

Gawas ni Kirk, nangigo usab  sila si Kenji Kojima ug Daiki Tanaka nga maoy nangulo sa  scoring rally sa Japan sa katapusang kuwarter.

Si coach Norman Black sa Meralco nagkanayon nga lisud gyud ang ilang kampanya tungod usab sa kakuwang niya sa players. Nasayran nga sa pag-abot nila sa Thailand, gidid-an pagduwa isip locals ang duha ka sinaligan sa Meralco nga sila si Cliff Hodge ug Chris Newsome.

Ang Pilipinas maningkamot nga makuha na ang daog karong gabii sa ilang pakigsangka sa Al Riyadi Lebanon.