Leonard hilom, apan lagsik ug malipayon

CEBU, Philippines – Si Kawhi Leonard gikatakda pang makigsulti sa mga sakop sa media didto sa Toronto sukad siya gi-trade sa San Antonio Spurs.

Hilom man tuod, apan ang All-Star forward lagsik ug malipayon kaayo sa iyang nahimutangan karon.

Mao kini ang gipasalig ni Raptors president Masai Ujiri agi'g pagbuak sa pagpakahilom sa bag-o nilang nakuha nga talento.

"He is determined and seems in the right frame of mind," matud pa ni Ujiri. "You will be hearing from him shortly. I think there is a fire inside of him and we are all excited about that."

Nakuha sa Raptors ang two-time 'Defensive Player of the Year' gikan sa Spurs uban ni Danny Green hulip nilang DeMar DeRozan, Jakob Poeltl ug umaabot nga draft pick. 

Masaligon si Ujiri nga si Leonard mopakita og nindot nga salida sa ilang koponan sa umaabot nga NBA season ilabi na kay mipakita kini og igong kadasig samtang nag-workout uban ang mga coach sa Raptors didto sa Los Angeles ug nakabisita na sab sa Toronto pipila ka higayon.

"Basketball person. Just loves the game," hulagway pang Ujiri ni Leonard. "Wants to play the game and very competitive. You can tell he is a very competitive kid. It's about basketball. Once you just start to talk about basketball his eyes change."

Matud pa ni Ujiri nga magsugod na sila sa ilang training camp sunod semana didto sa Vancouver ug dili nila hatagan og espesyal nga pagtagad si Leonard kay patas ang ilang pagtan-aw sa tanan nga mga sakop sa ilang koponan.