Baby Lancers pabiling wa'y pilde
CEBU, Philippines — Ang defending champion University of the Visayas (UV) Baby Lancers milusad og eksplosibong rally sa second half aron patikangkangon ang University of Southern Philippines Foundation (USPF) Baby Panthers, 78-60 ug pagpabiling wa'y pilde sa 18th Cebu Schools Athletic Foundation, Inc. (CESAFI) men's
basketball tournament kagahapon diha sa Cebu Coliseum.
Si Gabriel George Cometa mikadlit og 19 puntos, samtang sila si Joshua Yerro ug Mar Leandro Actub mihipos og 14 puntos matag usa alang sa Baby Lancers nga mao na lang karon ang bugtong wa'y pilde sa juniors division bitbit ang 3-0 nga baraha.
Nindot unta kaayo ang salida sa Baby Panthers gumikan kay yano silang nakagukod human mabiyai og otso puntos, 18-25 ug gani nakalabaw pa sa iskor nga 42-39 sa nahibiling kuwatro minutos sa third quarter.
Apan sila si Cometa, Samuel Melicor, Dave Basalo ug Albert Sacayan midagkot og 20-5 run nga nakapa-abante sa Baby Lancers sa hingpit, 63-50 sa final 6:46 sa aksiyon.
Igo lamang nakasikit ang Baby Panthers sa iskor nga 56-63 gumikan kay gitak-op sa Lancers ang duwa pinaagi sa 15-4 run aron pagposte og 18 puntos nga demolisyon.
Si Neon Chavez mipupo og 15 puntos, samtang sila si John Maglasang ug Kyle Ochavo mikolekta og 10 puntos matag usa alang sa Baby Panthers nga nakatilaw sa ikaduha nilang pilde sa tulo ka duwa.
Sa pasiunang duwa, si Matthew Paras mitagak og 19 sa iyang 24 puntos sa final half sa dihang gipakgang sa University of San Jose-Recoletos (USJ-R) Baby Jaguars ang kanhi wa'y pildeng Cebu Eastern College (CEC) Dragons, 77-70.
Si Paras mibubo sa iyang 11 puntos sa katapusang kuwarter diin ang Baby Jaguars miwani sa Dragons, 25-17 aron pag-inat sa ilang win-loss record ngadto sa 3-1.
Si Kevin Guibao miamot og 15 puntos, samtang si Keith Co milansang og siyete sa iyang nuybe puntos sa mangtas nga salida sa USJ-R sa endgame.
Si Rauric Panimdim dunay 22 puntos ug si Ivan Ares miamot og 17 puntos alang sa Dragons, kansang duha ka sagunson nga daog nasanta.
- Latest
