SMB makalahutay bisan wa si Fajardo
CEBU, Philippines — Wala mabalaka si San Miguel Beermen coach Leo Austria sa dugay nga pagbalik og duwa sa iyang sinaligang sentro nga si JuneMar Fajardo nga kinahanglan mopahuway og taas-taas nga panahon tungod sa injury sa tiil.
Gumikan kay matud pa ni Austria nakahimo na siya og mga adjustments sa iyang koponan human gi-anunsiyo nga dili makaduwa kapin usa ka bulan si Fajardo.
Napruybahan kini ni Austria human sila midaog sa una nilang duwa sa Governors' Cup human ilang gilubong ang NLEX Road Warriors, 125-112 niadtong Sabado.
Ang Beermen laraw nga moposte og 2-0 nga baraha sa ilang sangka batok Blackwater Elite karong alas-4:30 sa hapon didto sa Smart Araneta Coliseum.
Sa pagkawala ni Fajardo gihatagan ni Austria og dakong papel sa opensa si Christian Standhardinger. Mobida sab sa Beermen ang import nga si AZ Reid, Arwind Santos ug Marcio Lassiter.
Samtang sa main game sa alas-7:30 sa gabii, ang Barangay Ginebra San Miguel nagtinguha usab sa ikaduha nilang sunod sunod nga daog sa dihang ilang harungon ang NorthPort Batang Pier.
- Latest
