Didal makadawat cash incentive
CEBU, Philippines — Ang kagamhanan sa Dakbayan sa Sugbo mohatag og cash incentive ngadto ni Margielyn Arda Didal bugti sa iyang pagdaog og gold medal sa bag-o lang nahuman nga 2018 Asian Games didto sa Indonesia.
Kahinumduman, si Didal midaog og gold medal sa women's skateboarding event niadtong Agosto 29.
Si Konsehal Jerry Guardo nga maoy Deputy Mayor for Sports and Development miingon nga giaprubahan na sa konseho sa siyudad ug ni Mayor Tomas Osmeña ang iyang ordinansa alang sa maong katuyoan.
Sa City Ordinance no. 2468 section 5 item sa ordinansa nakalatid didto ang kagamhanan sa siyudad mohatag og P300,000 sa gold medalist, P200,000 sa silver ug P100,000 sa bronze.
"Ang procedure nato i-submit nila ang katong official result didto sa sports commission, buhatan og endorsement sa sports commission i-endorse namo diri sa council aron ma-process pud namo ang pag-release sa ilang financial incentives", matud pa ni Guardo.
Sa laing bahin, ang Siyudad sa Sugbo nagplano nga magtukod og skatepark diha sa South Road Properties aron paghatag og lugar niadtong mga mahiligon og skateboarding.
- Latest
