Hero's Welcome ni Didal

CEBU, Philippines — Mapasigarbuhon nga gisugat sa bagang duot sa katawhan si Margielyn Arda Didal, ang Cebuana ug gold medalist skateboarder sa 2018 Asian Games niadtong Agosto 29 didto sa Palembang, Indonesia.

Ang 19-anyos nga si Didal wala kapugong sa iyang emosyon tungod sa  init  nga  pagsugat sa mga Sugboanon kaniya.

"Wala ko kasabot sa akong gibati ron. Wala ko kabalo unsay akong gibati pa ron. Wala ko nag-expect gyud ani na welcome ang daghan nalipay," matud pa ni Didal nga mipilde sa mga lig-ong boardskater  sa Japan ug host team Indonesia.

Ang bag-ong garbo sa Sugbo mihimo og motorkada ug gihatagan siya og "Heros Welcome" sa Lahug Night High School diin siya nagtungha kaniadto. 

"Para gyud ni nila. Kun wala sila, wala ko diri karon. Para pud ni sa tanang Cebuanos ug sa tanang mga skaters sa Cebu ug sa tanan sa Pilipinas," matud pa ni Didal nga segurado na nga makadawat og P6 million nga incentive nga maoy gisaad sa kagamhanan alang sa gold medalist sa Asiad.

Ang amahan ni Margielyn nga si Lito, nagkanayon nga mapasigarbuhon  sa  nakab-ot sa anak niya nga mipursigi sa iyang damgo bisan pa sa ilang kalisud.  

Gikalipay usab ni Barangay Captain Hazel Ann Empleo  si Didal, apil na si Konsehal Mary Ann de los Santos nga usa sa mipasiugda sa "Hero's Welcome". 

Giasoy ni Didal nga wala pa'y babaye nga nakadaog og gold medal para sa Pilipinas ug karon natuman na niya ang dugay na niyang pangandoy nga mamahimong garbo dili lang sa Sugbo kon dili sa  Pilipinas. 

Atol sa mubo nga programa,  si Didal mipasundayag sa iyahang skateboard tricks nga gigamit atol sa Asian Games.

Tambag ni Margielyn sa mga batan-on nga padayonon lang ilahang damgo ug sundon gyud kon unsa ilahang pangandoy kay makab-ot gyud kini kon gustuhon. 

Si Margielyn uban sa iyang mga ginikanan molarga pagbalik didto sa kaulohan karong semanaha aron motambong sa 'courtesy call' didto sa Senado.

Si Didal mobakasyon una og kadiyot una siya molarga paingon sa Estados Unidos diin didto   mopaubos   siya og   mga training pagpangandam alang sa 2020 Tokyo Olympics.