Pilipinas mitiklo sa Japan

CEBU, Philippines – Namungot og maayo ang  Philippine  team human sa duha nila ka sakit  nga kapildihan dihang ilang  gimasaker ang Japan, 113-80  sa classification stage sa men's basketball event sa 18th Asian Games kagahapon didto sa Jakarta, Indonesia.

Usa ka adlaw human sa ilang kapildihan ngadto sa South Korea nga mipapas sa ilang paglaum sa medalya, ang mga Pinoy'ng basketbolista mipakita og kaagresibo sa duwa ilabi na nga walo ra ka  buok players ang Japan.

  Kulang og upat ka players ang Japan kay ang maong mga basketbolista gipapauli sa mga kadagkoan sa Japan delegation human masakpi nga migawas sa ilang headquarters didto sa Indonesia aron mag-inom ug mangabang og babaye.

Sa maong kadaogan, segurado na nga malabwan sa Pilipinas ang ilang seventh place finish niadtong tuig 2014. Moduwa sila sa modaog tali sa Syria ug Indonesia aron mahingpit ang ilang pagsakmit sa fifth place.

Nakatabla pa ang Japan sa first period, 27-all, apan pag-abot sa ikaduhang kuwarter, si Jordan Clarkson, ang numero unong nagbangutan sa ilang kapildihan batok Korea, nanginit sa scoring ug iyang gitabangan ang Pilipinas nga moposte og 10 puntos nga labaw sa pagtapos sa first half.

Nanginit  sab og maayo sila si Christian Standhardinger, Paul Lee ug Stanley Pringle sa sayong bahin sa third period ug nangulo sa  11-0  scoring run aron inaton  ang labaw sa 68-47 sa tunga-tungang bahin sa maong kuwarter.

Dili na malalis ang resulta sa duwa sa katapusang singko minutos sa fourth period dihang miburot na og maayo ang labaw sa Pilipinas, 99-78.  

Si Standhardinger maoy nangulo sa scoring sa iyang 27 puntos, samtang sila si Clarkson ug Lee adunay 22 ug 17 puntos matag usa.

Si Taichi Nakamura maoy topscorer sa Japan sa iyang 16 puntos, samtang si Naoya Kumagae miamot og 15 puntos.