Alvarez mihingan ni Golovkin nga 'hipokrito'
CEBU, Philippines — Ginganlan ni Saul 'Canelo' Alvarez ang karibal niining si Gennady Golovkin nga "hipokrito" nga seguradong makapainit og maayo sa gikahinaman nilang 'rematch' sunod bulan didto sa Las Vegas.
Si world middleweight champion Golovkin ug si Alvarez mokatkat sa ring didto sa T-Mobile Arena karong Septiyembre 15, usa ka tuig human sa una nilang engkuwentro nga miresulta ngadto sa kontrobersiyal kaayong panagtabla.
Gikatakda unta silang mag-abot og usab niadtong Mayo, apan nakanselar kini human si Alvarez napakyas sa drug test.
Nakapaulbo kini sa kaspa ni Golovkin nga miakusar ni Alvarez nga tikasan.
Pabilin nang nagbokal ang mainit nga dugo ngadto sa usa'g-usa kanila sukad niadto.
Dumot gyud kaayo ang duha gumikan kay mismo si Alvarez ang mipadayag nga lisud mahitabo nga magkaamigo silang duha ni Golovkin sa higayon nga mahuman na ang ilang away. (BANAT NEWS)
- Latest
