Pilipinas pakyas
CEBU, Philippines — Napapas ang damgo sa Philippine men's basketball team nga makahatag og medalya sa nasud human sila masugamak ngadto sa South Korea, 82-91 sa 2018 Asian Games kagahapon didto sa Indonesia.
Ang Pilipinas wala na'y paglaum bisan sa bronze medal ug paningkamotan na lang nila nga mapalambo ilang seventh place finish niadtong tuig 2014. Ang koponan ni coach Yeng Guiao aduna pay nahibiling duwa sa classification phase.
Nindot ang gipakitang duwa sa Pilipinas bisan pa og naglisud sa scoring si Cleveland Cavaliers cager Jordan Clarkson.
Gani milabaw pa ang Pilipinas og otso puntos, 52-44 sa tunga-tungang bahin sa third period.
Miabot ang labaw sa mga Pinoy og otso puntos, 52-44, sa tunga-tungang bahin sa third period, apan wala nila kini mapanalipdi ug hinayhinay nga gikitkit sa Korea ang labaw.
Labaw og uno punto ang Pilipinas, 68-67 sa sayong bahin sa final period, apan kalit lang nanginit ang three point shooting nila ni Heo Ilyung, Jeon Junbeom ug Kim Sunhyung aron mailog ang labaw sa iskor nga 83-72.
Gawas sa mga tirador sa Korea, wala usab makapugong ang Pilipinas sa naturalized forward sa Korea nga si Ricardo Ratliffe. Si Ratliffe miposa og 30 puntos.
Si Clarkson maoy nangulo sa scoring sa Pilipinas sa iyang 25 puntos, apan layo ra kini sa gilauman sa koponan. Giangkon hinuon ni Guiao nga naapektohan ang Fil-American sa hugot nga depensa sa Korea.
Si Clarkson nga mirehistro og 28 puntos batok China, igo ra nakapasulod og 10 sa iyang 25 ka tira.
Si Christian Standhardinger mitampo og 16 puntos, samtang si Stanley Pringle adunay 14 puntos.
Ang Pilipinas wala na makadaog pa og gold medal sukad niadtong tuig 1962. (BANAT NEWS)
- Latest
