2 medalya sa Team Phl
CEBU, Philippines — Mitali sa unang duha nila ka bronze medals ang Team Philippines pinaagi sa ilang men's ug women's taekwondo team kagahapon sa 18th Asian Games didto sa Jakarta, Indonesia.
Ang trio nila ni Rodolfo Reyes, Dustin Mella ug Jeordan Dominguez misakiyo sa bronze sa team poomsae event human gipilde ang Saudi Arabia. Namasin pa sila nga makasud sa gold medal round, apan gipakgang sila sa Chinese team.
Sa ilang bahin, sila si Cebuana Rina Babanto, Jana Oliva ug Juvenile Crisostomo mipukan sa Hong Kong aron musud sa semis, apan napilde sila sa host team Indonesia alang unta sa finals slot.
Sa laing bahin,si Hagen Alexander Topacio milampos usab paglusot sa qualifying rounds sa shooting event nga gipahigayun didto sa Palembang, South Sumatra, Indonesia.
Si Topacio mipwesto sa ikatulong dapit sa qualifying stage ug may tsansa siya nga musud sa medal round kon nindot pa iyang ipakita karong adlawa. Laing duha ka shooters nga sila si Jason Valdez ug Amparo Acuna musugod na usab sa ilang kampaniya karong adlawa.
Gidemalas hinuon ang ubang pambato sa nasud human ang Philippine women's volleyball team miyukbo sa Thailand, 3-0. May duwa pa hinuon ang koponan diin kinahanglan na nila nga mudaog.
Ang usa sa gisaligan unta sa nasud nga si Alvin Lobrequito wala usab kalusut sa una niyang sangka sa wrestling human siya gipilde sa taga-Uzbekistan nga si Uzbek Makhmudjan Shavkatov.
Sakit usab alang ni cyclist Marella Vania Salamat nga wala siya kasalmot sa iyang event dihang wala siya mahatagi og clearance sa iyang tunghaan nga mobiya una aron moduwa sa Asian Games.
Ang powerhouse nga China ug Chinese Taipei ang unang nakaiskor og bulawan kagahapon, samtang gawas sa Pilipinas, midaog usab og mga medalya ang mga atleta sa Korea, Iran, Vietnam, India, Malaysia ug Thailand. (BANAT NEWS)
- Latest
