Lesin mibihag sa CCT Builders sa CELBA Season 3

CEBU, Philippines – Mipabuto og 22 puntos si Erwin Budiongan alang sa Lesin nga mipilde sa CCT Builders, 98-87 sa CELBA Season 3 basketball tournament niadtong Miyerkules didto sa Canduman Housing gym, Mandaue City.

Ang Lesin ni Gilbert Lesin ug CCT Builders ni Engr. Chucho Tan pareho karong nagbitbit og 7-3 win-loss records.

Mipakita sab og maayong labok si Lesin diin miamot kini og 15 puntos sa iyang team nga miposte og 63-38 sa halftime, samtang ang laing tirador nga sila si Reyden Villaronza ug Barak Recto nag-amotay og 13 puntos sa  kadaogan.

Naalarma ang Lesin  sa second half dihang natipakan ang ilang labaw human sa makalilisang nga rally sa  CCT Builders sa giya nilang Ramon  Alburo,  Richard Madrid ug Tan. 

Mitawag og time-out ang Lesin aron pagputol sa momentum.

Misuway og gukod ang undermanned nga CCT Builders, apan nausik lang ang ilang mga paningkamot kay naabtan sila sa oras.

Si Madrid miburak og 28 puntos, lakip na ang tulo ka tres sa fourth quarter nga maoy pabilo sa gihimo nilang rally, samtang si Tan miamot og 16 puntos, 10 niini iyang nahimo sa fourth period. Sila si Francis Palero ug Edgar Beldera nagkumboya'g 22 puntos sa CCT Builders.

Sa laing aksiyon, ang Butch Surveying mipilde sa AC Troopers, 61-52 alang sa ilang 8-2 record.

Si Ramie Suson maoy nangu sa Butch Surveying nga maoy midiktar sa tibuok duwa.

Ang 4-6 nga AC Troopers ni S/Insp. Dondon Coloscos nga gipaluyohan sa Bol-anon Eatery, gipangulohan sab ni Harvey Magale sa iyang 10 puntos.

Dose puntos ang labaw sa Butch Surveying pagsugod sa fourth quarter, 42-30, apan gikalingawan kini og kitkit sa AC Troopers hangtod nga miabot na lang og singko puntos, 50-55 sa nahibiling 40 segundos sa free throws ni Magale ug didto ra kutob ang maayo nilang salida kay wala  nila mapugngi ang  kabangis ni Suson sa nahibiling mga gutlo sa duwa.

Ang liga nga nahimo pinaagi sa paningkamot ni S/Insp. Dondon Coloscos, gipadagan nilang Ramel Baclay, Willy Medillo, Richard Limosnero ug Noel Tayag.

PUNTOS MATAG USA

Unang duwa: 

LESIN (98) – Budiongan 22, Lesin 15, Villaronza 13, Recto 13, Ocier 8, Sicad 8, Pacquiao 6, Villarosa 5, Rosacena 4, Abatayo 4.

CCT Builders (87) – Madrid 26, Tan 16, Palero 12, Beldera 10, Alburo 8, Ouano 5, Seno 4, Flores 4, Goc-ong 2.

Ikaduhang duwa:

BUTCH Surveying (61) – Suson 13, Mahusay 9, Taghoy 8, Cabonelas 7, T. Alcover 4, Aligway 4, E. Alcover 3, Castillo 3, Herbieto3, Magale 2, Migallen 2, Monterola 2, Pelit 1.

AC Troopers (52) –  H. Magale 10, Saldua 9, Ouano 7, Englis 5, Baclay 4, Chavez 4, Coloscos 3, Areja 2, Suico 2, Lavador 2, Cabiluna 2, Postrano 2.